Agnes B Smart Bag

自從睇過bubibu介紹過的內膽袋，一直都想搵番個...
有日經過地鐵睇到個Cosmopolitan廣告送Agnes B bag，望埋去好似內膽袋...
於是去咗好多間7仔同OK睇，但都無嘅? 唔同買哂?

過咗幾日突然間諗起，上網search下先....
原來係明天出，仲有機會....好野!!

仲於到手啦! 叫Agnes B Smart Bag，一早去睇，搵咗好多間先有黑色...
有白色，粉紫，同黑色，黑色應該最多人想要...
可惜內部無分格，但整體都ok靚，算係咁啦!!
呢個應該係Agnes B第一次同香港雜誌合作出贈品...
大家覺得如何呢??

婚後第一個情人節

新年過後，話咁快又情人節啦!
今次係婚後第一個情人節，可惜係星期一要返工，
只有夜晚時間，出去食咗餐飯，行咗陣就返屋企lu...

通常節日我地都會互送禮物，但都係對方想要的(雖然會無驚喜，但實用)，
而我有時會DIY俾Gar仔，可能唔實用，但有心意，佢會收藏...

今年Gar仔問我想送咩俾妹妹，而我最近一直都想用Bobbi Brown(BB)既concealer，
有好多朋友都話好用，不過比較貴，但好用的話，貴D都值得。
於是去咗試，BB既底妝真係好pro，好多顏色同選擇。
BA姐姐同我試咗個eye cream，因為最近眼皮極度乾燥...
試咗個色都幾好，但我下眼皮實在太乾啦!! 救命!!!

之後BA姐姐仲送咗啲sample俾我試....very good。
因為我買咗一定價錢，佢話仲有個makeup class俾我，大約1個鐘。
太好啦！　下次試完再share下啦！

而今年我準備咗大口仔毛毯俾Gar仔。
佢最近幾年都好鍾情大口仔，現在有自己屋企, 都有時會買大口仔既野。
曾經見佢對住大口仔毛毯話"如果有人送俾我就好啦!".......
之前太忙都唔得閒去睇，再上次睇只得張display，無貨，所以無買...

今次Gar仔好仲意同開心呀!　
但毛毯應該要入番張被套先，因為要洗都好麻煩...
等我下次買埋張大口仔被套先...　哈哈！

CNY Gathering

結婚之後都想約班兄弟姊妹食飯,
有好多次約大家上黎但好難約齊人, 唯有分幾次攪...
新年個時掂都要攪番次, 於是約咗班兄弟姊妹上黎玩, 逗利是, 同食大餐.

自家製 - 雜果Salad　　　　　☆大家都話好好味, YEAH!!

自家製 - 西籣花炒帶子　　　　　☆帶子太硬添, 下次再努力

自家製 - 焗雞翼　　　　☆燒味的雞翼, 極容易整, 仲好好味添, 最後清哂

Pizza Hut 花開必勝批　　　　　　☆唔錯, 但芝士邊要趁熱食

外賣壽司　　　　　　　　　☆好味

成枱野食, 哈哈!!

食飽之後, 多謝表妹借出Rummikub, 大家玩得好開心....

兄弟們又玩winning....

多謝大家賞面, 大家都玩得好開心, 食到飽飽....
雖然今次都係唔齊人, 希望下次黎唔到的都可以黎....會再攪...哈哈!!

婚後第一個農曆新年

明日就過年啦！祝大家新年快樂，身體健康。

時間過得好快，今年係結婚後第一個農曆年，要派利是啦！
之前睇過zacca dream 利是封好靚，曾經有諗過自己整，但最後當然放棄，
實在無時間做，有都用來和做家務。
放工後雖然唔使煮飯，因為可以去奶奶屋企食，但家務點都要做。
原來做媽咪真係唔容易，多謝母親大人。

今年係第一年會有親友上黎，當然要粉飾一下間屋。
於是買一公仔佈置，有大口仔一家人，鬆弛熊一家人。哈哈！

利是封亦由四方八面收集返黎，一次過大晒冷。
今年利是封好似越來越靚，越來越多花款。

IT同事當然俾電腦品牌Lenovo同電盈啦！
不過Lenovo紙質麻麻，電盈好好多...

家裡的小朋友就俾鬆弛熊同荃灣廣場兔仔，佢地好得意。

咁多款利是封當中最仲意荃灣廣場兔仔。
Design靚之餘好有心思，封口喺兔仔頭，好特別好funny...

兔仔嘅耳仔都內有乾坤，厲害！同主題一致...

入好後就加上貼紙，連貼紙都做到可以襯番兔仔。掂呀!!

其他仲有吉之島，其他電腦公司，McDonald等。。。

希望大家都開開心心過一個祝福滿滿的新年。