接新娘 Part 1 ☆出嫁前的心情☆

當日約了化妝師7點，6點左右就要起身。
當時仲係好攰，但再唔起就唔夠時間...
梳洗後，著件外套就同母親大人去食早餐
母親大人食開中式早餐，好似唔係好慣西式，但都要食。
我係一個3餐都要食既人，咁早起身更加要食野。
食完之後，返房開門時，好似化妝師同助手都剛剛到，好準時...Good。

化妝師同助手入到去就立即SETUP要用既野，我都準備好啦!!
化妝師開始幫我上妝，助手就幫手SET頭...
姊妹們一個一個到達，雖然見唔到，但佢地有入黎睇下我...

新郎方面，我叫佢地約好哂8點到達酒店樓下。
佢地之前仲約咗去m記食早餐，因為當時仲好早無咩人，佢地嘻嘻哈哈 食早餐。
食飽飽就行過黎酒店準備。

連攝影師，統籌同其他親友都到咗，太好啦!!
統籌話見到新郎已經喺樓下，攝影師就去同佢地影相先。
你睇下佢地幾"得戚"...

攝影師都影到好熟，知道咩景好睇，內外景都有影。

影完新郎兄弟，係時候到新娘姊妹。
我都剛剛化完妝，母親大人幫我著上裙褂，今日終於出嫁啦! 要擁抱...
攝影師幫我影咗好多snap shot，有啲都影得幾靚，好仲意。

我們來了一個祈禱，希望將呢個大日子交到主的手裡。
原本前幾日天氣都唔穩定，好驚落大雨，但神真的看顧我們。
一早起身天氣好好，唔熱唔凍，仲有少少陽光。
當日的安排同將來婚姻路上的一點一滴，都求主保守同祝福。
因為太感動，感謝神的帶領，眼淚就一滴一滴流出來，幸好無整花妝容...哈哈!

雖然只係室內，但都影咗客廳同大床...
我都覺得當時好幸福..好開心.....哈哈哈!!

to be continued....

出嫁前的準備

不知不覺，原來結婚已經9個月。
回想當初結婚之前心情好緊張，有好多野想做同預備，可惜我都係想多做。
Anyway，我整體都好滿意，當日都好順利，
最重要都係我地一同喺神面前同親友既見證下許下婚姻承諾，
相信我地一定得到幸福同祝福。  

諗返起前一日真係忙到爆，因為有好多野都係要前一日先可以攞同做。
禮服，鮮花球，酒店，etc...真係去之前要plan好路線先。
除非有好多人幫你，但我想新娘子都係緊張啲，想親力親為。
 
要mark低有咩要做，地點，時間...
我當日攞住出嫁要用既行李去咗攞酒店房，之後搭車去試禮服(最後fitting)，
都試咗成個鐘, 最後約埋攞花球，由朝攪到夜晚，連手提都無哂電...

我當時仲用緊Sony G900，好唔掂，成日hang機無畫面，
但仲可以接電話，係睇唔到邊個打黎。
最後要打開電池個cover先可以用耐少少，始終用咗2年，要換機。

行咗成日，母親大人幫忙去book餐廳，食番餐好。
阿哥今日幫咗我地攞咗成日，仲請我地搭的士週圍去...真係好多謝大佬。
 
食完飯之後，上酒店休息，唔好以為可以早訓...
其實我仲未完成所有物資分類，仲要借酒店電腦上網，睇下有無其他問題。
連絡有關人士當日要留意的重要事項，最後都梳洗完都成1-2點。
心情仲好緊張，但又極度疲倦...
仲有4小時休息，唯有叫自己快啲瞓...
 
仲以為我準備好哂，最後都係有野唔記得...
有關工作人員有哂物資list，但我居然唔記得係啲袋上remark返係咩物資。
我最初都唔覺，有姊妹喺準備遊戲既時候問啲物資放係邊個袋，
我當時化緊妝，先諗起我無喺啲袋remark係咩黎...
多得幫姊妹幫手，佢地最後自己攪掂啲tasks。
好多謝佢地...

 

DIYの感謝相架

一直都想做啲手作仔當回禮禮物，但婚前都無咩時間攪，唯有婚後攪啲，
但要每人一份又真係有啲難，所以偏心咗暫時整咗俾同事。

做法簡單，但做一個都要些時間。

1）量度好前後要用幾大張紙
2）記得後頁左右兩旁要多留少少，用來貼住前頁。

3）用摺紙機摺出摺痕。

4）用花邊打孔機打出四邊角。

5）想試將相放入四角。
6）無問題的話，把多留的兩邊用雙面膠紙貼上前頁，完成。


可以再加上裝飾。 同事們收到都話好靚，希望佢地仲意。

Bobbi Brown Makeup Class (Part 2)

早個輪去埋Bobbi Brown上埋個Part 2 "眼妝&眉妝"。

Cheers:
今日因為上返類似上次個妝，雖然已經加咗胭脂，但今日BA姐姐教我有時可以mix胭脂用，
一個淡，一個sharp。不過可能好少會mix胭脂啦，好少會買咁多隻胭脂顏色，唔似得眼影。
Eye Brow:

跟住學畫眉，眉型都好影響成個妝，就算平時只係上少少遮暇同碎粉，無任何眼妝，都會畫下眉。
有時有眉毛過長嘅問題，要自己修又唔係太整齊，所以間唔中都會出去修下，係唔同啲。
首先用同頭髮差唔多色嘅眉粉畫咗先，想啲眉毛定啲，可以加啲眉gel固定下。
因為眉毛過長，所以之前都買咗，希望可以固定下，不過眉gel有啲難用，要多加練習先得啦！

Bronzer:

之後試用埋陰影粉/輪廓粉，我都係第一次用，BA姐姐話我面型同下巴都夠尖，
唔用都可以，但佢話當然都要教埋我啦！
完來陰影粉除咗用喺面同頸之外，如果著底胸衫都可以加，令能線條更深，咁都得，哈哈！

Eye Shadow & Eye Liner:

終於入正題 - 眼妝，平時都係買啲粉色眼影多，深色好少買，驚自己上得唔好，
好似熊貓點算，所以今次有人幫我化，可以一試。用咗灰色，做咗個漸變效果。
mix 眼影都係一個淡，一個sharp，可以其中sharp帶閃，效果會再出啲。
都唔錯，仲可以carry到，如果深藍或黑色，可能就唔得啦，嚇親人。

之後就上眼線，用上佢地出名的眼線液，之前朋友幫我試過，但因為內雙眼皮，無咩效果。
所以眼線都唔使上得太高，主要都係眼睫毛的位置，如果想效果出，用深色眼影打造雙眼皮會好啲。
下眼線都要上，去到眼珠下面就差唔多，因為我下眼睫毛好少，少得可憐，
BA姐姐提議我唔好上下睫毛膏，用眼線效果會好啲。不過影出黎都唔係好睇到....

Mascara:

最後夾上睫毛加上睫毛膏，就完成了。
今次無買任何野，BA姐姐都無hard sell我，只係問返上次底妝用邊隻。

After Workshop:

其實Bobbi Brown啲化妝品都比較平實，返工用都唔錯，
但趁年紀仲用到粉色，我都係仲意粉色多啲，會後生啲。

返到去俾Gar仔望下，佢話都幾好，叫keep到夜晚。

因為平時好少化妝，間中Gar仔都會叫我化下，特別係旅行個時，咁我都會配合下，
我有時都唔知點解旅行個時會有多啲心機打扮，可能可以吃喝玩樂，特別有心機，哈哈！

☆維港旁的約定☆2週年

本來想慶祝結婚半週年，係5月7日，但實在太近母親節5月8日，
所以都無點慶祝，因為食得太多餐啦！
其實咁啱好耐之前入咗訂婚個日子(係6月1日)落電話calander，
前一日個reminder彈出咗黎，所以心血來潮想出去食飯，
因為都好耐無同老公出面食。

我地去咗來自日本的CoCo壹番屋 Curry House，上年由日本引入香港，
好多人食，等我地都去試下先。

因為早過食飯時間到，仲有好多位，坐底叫野食，
原來有飯量、咖喱辣度可以選擇，幾好。

我地仲轉做套餐有湯同飲品，本來想食雪糕，但太凍，下次先。
呢個就係我個湯，和風雜菜湯，個樣勁似咖啡，味道就麻麻地。

最後叫咗下面的咖哩飯:

吉列豬扒奄列咖喱飯
賣相唔錯，Gar仔叫咗小辣，佢話原來小辣都幾辣。

忌廉雞肉奄列咖喱飯
我唔食得辣，叫咗唔辣，甜甜地，唔錯。

食到好飽，味道唔錯，只是份量對我黎講好似多咗啲，很飽。
但其實都幾貴，一個飯要$60-70大元，唔可以經常食！