法國婚紗Pre-Wedding分享 - Part 3

之後就返去九龍塘叫外賣食...已經3點啦!
食之前佢地幫我換衫同轉髮型...之後先有得食...餓死啦!!

好開心食咗個tea...食完又黎過...影室內舒服好多...
起碼D衫乾淨,個人都舒服D...不過已經好攰...

影咗紫色,白色,乾花同窗簾背景,之後仲有酒吧,sofa,琴,公仔...
因為落雨,所以好快天黑...園林景要一個月後補影

整體都玩得幾開心...
好心急到揀相個日,唔知效果出黎係點呢??


有啲野係提醒大家去之前(去其他影樓都係)要留意:

＊最好自己有心水想點影.如果無,參考返佢地啲sample(或者website啲相)
＊如果有影video,一定要睇佢地website明星啲video,先知道佢地點影同你地想要咩效果.
＊記得同攝影師講會著咩色咩style既禮服,以免同背景撞色...
＊如果仲係新年時間影,最好預備啲利是俾工作人員,呢啲錢唔慳得,大家影得靚影得開心最重要...
＊記得留意下佢地用咩假眼睫毛,因為效果幾自然,大日子個日可以用類似的...等我下次影都問下阿Ling,因為補影要自備假眼睫毛.


希望大家影pre-wedding都開開心心,有個美好回憶...(*^-^*)

法國婚紗Pre-Wedding分享 - Part 2

拍完北潭涌,就要去碼頭上遊艇. 上車前係小食店買燒賣食...熱辣辣好好味呀!!
到咗碼頭就上遊艇...都幾靚...但可惜開始落雨,而且越來越寒冷 (>_<)

上咗遊艇之後就開船啦!休息咗一陣又開工...
去咗船頭影先,個地好滑...落雨又有鞋印,都幾污糟,
睇住佢地影相原來都唔容易,除咗我地要擺post,
佢地都要就返唔同用角度去影,有時都要坐地下,瞓低影...

影完船頭,又去咗船頂,有個好似日劇既水晶紅蘋果,唔知影出黎咩效果呢?
之後又去咗船尾,影阿Sa同Angelababy都有影既瞓船尾甲板...因為落雨,凍到爆...落去船尾個時,仲滑倒...好痛...       (T_T)
呢下仲要露腳...快D啦!!                 (@_@)
下著雨,個妝都容哂啦!!                   (~_~)
連助手阿朱都叫我加油,頂住呀!... (-_-!)

最後因video既原故,要返去船頭拍D野...
攝錄師仲會坐快艇,我地要做個揮手動作...哈哈!! ~\(^o^)/~
終於影完遊艇...可以休息一陣....-_-zzZ

雨越落越大,最後大家係船艙休息咗約20分鐘...
有對後來才來到的新人,因為落得幾大雨,要下次再補影...

休息過後,再坐快艇到沙灘同橋影...沙灘上有上次留下用既心心印...
但唔知點解無影,可能D沙太濕…
去到橋,因為太大浪,都無坐落來影.附近有個千秋,再上埋去影幾張相.

之後又係video時間,今次係上船個度影,因為幾凍,所以著咗Gar仔件外套...
攝錄師哥哥話個效果應該幾特別....老公照顧老婆...
就係咁完成咗外景拍攝.過程幾好玩, 好似去咗旅行
雖然都幾辛苦...但係一個同Gar仔幾好既回憶....

都係Gar仔幫我影, 暗咗少少, 但有20多位朋友仔話Like, 哈哈!!

(待續...)

法國婚紗Pre-Wedding分享 - Part 1

之前去咗法國婚紗影咗婚紗相!!好開心好好玩,但個嗰星期突然轉冷,好凍又落雨,凍到我滕滕震...
前一日下午去咗拿花球同高跟鞋,買新鮮頭花,返屋企食完晚飯之後,沖涼,做mask,磨沙,指甲油...準備影相的野. ..最後都攪到12點先瞓...-_-zzZ

第二日一早就出門口,比平日返工仲要早... 因為八點三之前耍去到九龍塘影樓.
到達一陣,就去咗換衫,然後化妝set頭.

我個化妝姐姐係阿Ling,好nice,俾咗我造型上的意見.仲有個叫琳琳的女仔幫手set頭...
阿Ling幫我整咗個雙眼皮出嚟,仲加咗眼睫毛上去,睇落去雙眼皮無咁假...

化妝真係好勁,咩瑕疵都遮哂!Tone番全身既顏色,成個人唔同哂,
啲朋友睇相都唔認得係我,可能因為我平時勁少化妝啦!

妝扮完就出外面影幾張相,睇下咩笑容效果會好D.
始終大笑個人睇落開心D同幸福D.

攝影師有Frankie,助手係阿朱同Anthony,佢地都好nice,會攪D氣氛引我地笑多D.
佢地做開做慣已經知道有咩動作要做...
每影一張都會教我地擺post,有D真係無諗過咁擺法...作為女仔D動作要更加S形.

佢地用既相機機身係CANON 5D MART II,鏡頭係Gar仔想買的24-105mm L鏡...^-^

影咗幾張相之後就同另一pair一齊出發去北潭涌,約30分鐘車程.
到達(好凍!)落車之後都要行一陣,去到水邊影...隨行仲有一個女仔同我地補妝...

條裙開始污糟,連雙腳都不能幸免...最後連鞋都唔著,
然後行去橋邊影,仲影埋video的片段....好似拍戲咁,但我地做得好差.

Gar仔幫我影...好唔好睇??

(待續...)

L&#39;OCCITANE做FACIAL

好緊張, 後天就要去影婚紗相啦!
今日去咗試星街的Spa L'OCCITANE的facial...五星級的享受^^
因為上司俾咗張六折COUPON我...
但星街有D遠, 唔太近MTR.

星街係旗艦店, ELEMENT都有分店.
環境唔錯, 一開始有花茶飲, 然後Foot Massage一陣.
就開始做facial, 我選了"橄欖淨化煥釆療程" 75mins
做磨沙, steam面針清, 橄欖面膜, 草本面膜, 乳木果hand massage,
肩頸massage...都幾全面同舒服...

做完仲有花茶同餅乾俾我...
之後例牌介紹一下剛才用過的產品同package, 但沒join到, 太貴啦!!
但佢D body lotion係幾正o家!!
之前用過佢地的乳木果(shea butter)body cream, 唔錯唔錯!!